Астана жәрмеңкесінде қазақтың бауырсағына Кениядан қызығушылық артты

Елордада өткен отандық өндірушілер жәрмеңкесінде ұлттық өнімдерімен танылған "Адал Ас" компаниясы көпшіліктің назарын аударды. Табиғи әрі дәстүрлі тағамдарын ұсынған компанияның көрмесі келушілерге ерекше әсер қалдырды. Жәрмеңкеге келген қонақтар арасында шетелдік туристер мен кәсіпкерлер де болды. Солардың бірі — Кения елінен келген тұтынушы қазақтың ұлттық тағамы бауырсақтың дәмін татып көріп, оның табиғи әрі ерекше дәміне жоғары баға берген. Ол бірден бірнеше қорабын сатып алып қана қоймай, өнімді Кения нарығына экспорттау туралы ұсыныс жасаған.

Шетелдік қонақтың айтуынша, бауырсақтың жұмсақтығы мен ұлттық нақыштағы дәмі өз еліндегі тұтынушыларды да қызықтыруы мүмкін. Бұл ұсыныс отандық өнімдердің халықаралық нарықта да сұранысқа ие бола алатынын көрсетті. Компания өкілдері тек өнім сапасымен ғана емес, жоғары мәдениетімен де ерекшеленді. Олар шетелдік қонақпен өзге тілде еркін сөйлесіп, тауардың құрамы мен дайындалу ерекшеліктерін жан-жақты түсіндіріп берген. Мұндай ілтипат пен кәсіби қарым-қатынас кениялық тұтынушының көңілінен шықты.

Мамандардың пікірінше, ұлттық тағамдарды халықаралық деңгейде таныту — қазақ мәдениетін дәріптеудің бір жолы. Ал мұндай жәрмеңкелер жергілікті кәсіпкерлерге жаңа серіктестер тауып, экспорт көлемін арттыруға мүмкіндік береді. Астана қаласында өткен бұл шара отандық өнімдердің әлеуетін тағы бір мәрте дәлелдеді. Қазақтың қарапайым бауырсағының өзі шетелдік нарыққа жол ашуы — ұлттық брендті дамытудағы маңызды қадам.